ازاى تعمل لوجو مبدأي للـستارت اب؟
طبيعي كلنا حوالينا علامات تجارية كتير جدًا، بس فيه سؤال اسأله لنفسك، هل شوفت أى علامة تجارية كبيرة من غير لوجو؟ أكيد لأ، لازم يبقى في لوجو بيعبر عن الشركة أو الشركة الناشئة دي وبتعبر عن منتجاتها وعن خططها وطموحتها مش بس لوجو بنرسمه او بنصممه، لكنه كمان هو يعتبر الوسيلة اللي بتنطق مكانك وانت مش موجود وبتعبر عن هوية شركتك الناشئة وبتقنع الناس يشتروا المنتجات اللي بتقدمها.
طيب ممكن نعمل لوجو ازاى؟ وازاى نقدر نصمم هوية مميزة لينا؟ في المقالة دي امشي مع الخطوات هتلاقي نفسك فهمت اللي مطلوب منك بالظبط علشان تطلع لوجو مميز ليك!
فيه شوية اسئلة محتاج تسألها لنفسك وخطوات محتاج تخطيها علشان تصمم أول لوجو مبدأي لشركتك، أول سؤال تسأله لنفسك:
أنا مين؟
قبل ما نروح نعمل لوجو أو علامة تجارية أو نفتح محل او ونبيع أو نشتري، قبل كل الخطوات دي محتاج تسأل نفسك اسئلة هتساعدك في انك تفهم الشخصية الأساسية اللي بتحرك علامتك التجارية؟ لازم يكون ليك فكرة واضحة عن الشخصية اللي بتوصل للناس من خلال اللوجو أو علامتك التجارية ومثال على كده لو شوفت اللوجو دا
فهمت يعني ايه الشخصية؟ يعني الحاجة اللي عايز عملائك يحسوا بيها أو ينتموا ليها لما يشوفوا اللوجو بتاعك، والشخصية دي علشان توصلها لازم تسأل نفسك الأسئلة دي:
- احنا بدأنا الشركة أو المشروع دا ليه؟
- ايه هى أهم القيم اللي بتجمعنا؟
- ايه اللي احنا متميزين فيه عن المنافسين؟
- لو هتوصف منتجك في 3 كلمات، ايه هى الكلمات دي؟
ليه محتاج لوجو؟ وليه لازم يبقى مميز؟
اللوجو بيترك تأثير كبير على الناس وعلى انطباعهم الأول من خلال انه هيوفر لعملائك المعلومات اللي محتاجين يعرفوها عن العلامة التجارية وعن المنتج اللي بتقدمه وهل مناسب ليهم ولا لأ، وقولنا فيل كده انه بيعبر عنك وعن طموحاتك وخططك المستقبلية، فلازم تتأكد من أنه يتنفذ بشكل جيد، لانه مش بس الناس هتشوفه على صفحة الفيس بوك بتاعتك لكن كمان على الويبسايت الخاص بشركتك والتعبئة والتغليف والكارت الخاص بيك وعلى التواصل زى الواتساب والتليجرام، لازم يبقى مميز ولازم يخلي العميل مُندهش عايز يشوف ايه دا وينجذب ليه.
اجيب الإلهام منين؟
خلاص احنا عرفنا احنا مين وايه الشخصية المميزة بتاعتنا، وليه محتاجين لوجو، طيب اجيب الإلهام منين؟ ودا هيبقى جزء صعب شوية، هنديلك شوية نصائح امشي عليهم علشان تقدر توصل لشكل معين للوجو بتاعك:
- العصف الذهني
- اقف مكان عميلك وشوف انت محتاج تشوف اللوجو ازاى.
- شارك كل اللي حواليك في انكم تختاروا أفضل لوجو.\
ودي مواقع من خلالها تقدر تشوف إلهام ولوجوهات كتير جدًا
ايه الاستايل اللي أصمم بيه؟
استايل اللوجو بيقول كلام كتير جدًا عن الهوية بتاعتك بس من خلال الاستايل هتودي العميل للشخصية والإحساس اللي عاوز توصله
لوجو الحروف (LetterMark):
هو ابسط طريقة للوجو لو كان الشركة اسمها كبير مكون من كذا كلمة مع بعض زى لوجو ناسا (NASA) وهو في الأصل اسم الهيئة أو المؤسسة (National Aeronautics and Space Administration) أكيد مش هنعمل لوجو فيه كل الكلام دا فبناخد أول حرف من كل الكلمات ويطلعوا كلمة ومن الكلمة دي بنعمل اللوجو.
لوجو الكلمة (WordMark):
وهى طريقة مثالية لو كانت اسم شركتك قوي وواضح، لوجو الكلمة بيزود القوة دي وبيمنحه شخصية وقيمة تقديرية أقوى زى جوجل (Google)، لكن اتأكد من اختيارك الخط المناسب لتصميم اللوجو.
لوجو الصورة أو الرمز (PictorialMarks)
لوجو الرمز هو لوجو بسيط وسهل جدًا في حالة ان اسم شركتك بيعبر عن دا فعلًا زى شركة Apple او Twitter والنوع دا من اللوجو بيخلق اتصال قوي وفريد مع العملاء وبيرتبطوا بيه دايمًأ.
اللوجو المجرد (AbstractMarks):
هو لوجو شبيه بلوجو الصورة او الرمز لكن بدل من التفاحة والطائر ممكن يكون شكل هندسي او شكل بيشرح حاجة داخل الشركة مش لازم يكون الشكل مفهوم أوي لكنه بيعبر عن الشركة بشكل قوي وصريح، ممكن ناخد لوجو شركة أديداس كمثال، الخطوط الثلاثة ملهمش معنى هندسي لكنهم بيعبروا عن اهداف الشركة وارثها وهى التنوع والشمولية والانتشار العالمي.
لوجو التميمة (MascotMarks):
وهو لوجو بيضم شخصية مشهورة أو شخصية البراند معروف بيها، وفي الغالب بتكون كارتون مرسومة، ودا بيظهر اللوجو جدًا وبيتكلم عنه، زى شعار دجاج كنتاكي،
اللوجو المركب(CombinationMarks)
وهو لوجو بيجمع الصورة والكلام مع بعض وبيكون الكلام داخل في الصورة أو جنب بعض أو الصورة فوق والكلام تحتها، والاستايل دا هو الخيار الشائع لانه بيسمحلك تستخدمه بأكتر من شكل ممكن اللوجو بس وممكن الكلمة بس وممكن الاتنين مع بعض وممكن التميمة لوحدها زى لوجو امازون.
تفتكر لوجو فني مبتكر ينتمي لأى ستايل في الشعارات؟
كده احنا وصلنا لجزء مهم جدًا، كشركة عرفت ايه هى الشخصية اللي عاوز عملائي يشوفوها، وليه محتاج لوجو وليه لازم يكون مميز ومنين الاقي الإلهام علشان اصمم اللوجو، وايه أنواع الشعارات ..طيب أبدأ منين؟
فيه مواقع كتير جدًا ممكن تساعدك انك تعمل اللوجو بتاعك منها المجاني ومنها المدفوع:
مواقع تصميم اللوجو مجانًا:
TailorBrands – BrandCrowd – LOGO.COM – Looka – Canva – ADOBE – Design Hill
وانت بتصمم اللوجو لازم تكون واخد بالك من النقط الجاية:
- لازم يكون الخلفية مخفية أو بيضاء: الصورة ليها اسم وليها خلينا نقول عيلة وعائلات الصور محددة منها (PNG-JPEG-JPG-SVG) وغيرها، أفضل عيلة أو فورمات يكون اللوجو بتاعك منتمي ليه هو PNG أو JPG
- اللوجو لازم يبقى فيه مساحات بيضاء علشان بيديله أناقة لطيفة جدًا وكمان بيسمح أننا نستخدمه أكثر واكثر في حاجات كتير، تخيل لوجو مليان ألوان وبنعرضه على المسرح في الحفلة النهائية، هيكون شكله مش ألطف حاجة غير لو فيه مساحات بيضاء بتخليه يتنفس أكتر وأكتر.
- الألوان ونظرياتها كتير جدًا وممكن تدخل على جوجل تقرأ عن نظريات الألوان وازاى تختار لون البراند اللي بيعبر عن شخصيتك لكن هقولك على 4 تصنيفات هينقلوا البراند بتاعك في مكان تاني
- لون واحد فاتح للخلفية.
- لون واحد غامق للنص.
- لون محايد ينفع لكل الاستخدامات.
- لون واحد يلفت النظر.
ممكن تختار ألوانك من الموقع دا Colorhunt.com
- الخطوط اللي هتسخدمها لازم تكون متماشية مع الشخصية واللوجو بتاعك وبنستخدم خط واحد أساسي للعناوين وخط تاني للكتابة الكتير.
شكرًا لكم.